Proklamasie,
Iech Prins Dave d`n iersjte,
Informaticus, computerdoktericus, horecaheldicus.
Groetvorsj vân `t Italiaanse kruuspunt.
Graaf vân de meule tot aan d`n dâmp.
Consul en gevolmachtig ambassadeur in Eijsjde.
Landvoog vân alle printers, laptops en alles wat daor mèt te make heit.
Besjermhier vân alle Hierder meidsjes.
Beej de gratie vân alle obers in Hier en dao boete, en regerend euver alle inwoenersj vân Hier,
Dicteer en verordeneer
Ten iersjte: tot v`r zinge ‘Mesjtreech viert vastelaovend, Mesjtreech geit aon de geng. M`r veer zinge: ‘gans Hier viert dit jaor eindelèk weer Karneval’.
Ten twiede: Tot veer d`r, same mèt De Sjraveleirkes en ôs Sjravelvrôluij, `nne sjieke Karneval vân goon make nao die paar jaor vân corona.
Ten derde: Tot veer dit jaor auch weer langs de deure kome mèt `t Sjraveleirke en geer m`r veul plezeer höb in `t leze.
Ten veerde: Tot `t Karnevals virusj in alle laptops en computers in Hier maoge rondviere.
Ten vijfde: Tot dit jaor beej alle klassiekers zoe wie zoervleisj, greun sop en tete de veau, veule soorte pizza`s touwgevoog maoge weure.
Ten zèsde: Tot veer d`r alles aan zalle doen öm de luij in Hier zich minder allein te laote veule.
Ten zevende: Tot veer allein al dao öm èderein oprope öm vrijwillegerswerk te goon doen.
Ten achste: Tot Aen de wan nog hiel lang ope maog blieve, en `n ontmoetingsplek veur èderein oet Hier maog blieve.
Ten negende: Tot de parkeerplaatsje vân winkelcentrum De Leim altied vol maoge blieve sjtoon, auch al zien ze af en touw g`t krap öm oet te sjtappe.
Ten tiende: Tot veer alle Karnevalsdaag begeleid maoge weure door `t Karnevalszönneke.
Ten èlfde: Tot de raod vân èllef en alle ander Sjraveleirs opdrach kriege op te lètte tot al dis iersjgenömde punte naogeleif weure.
Gegeve 15 Jannewarie 183 x 11 + 10, Prins Dave d`n iersjte ,
Lang leeve de Hierder Karneval!
Versjlaag vân de Kroenraod
De derde Dinsdig in September…De mieste vân ôs kènne dea dâg natuurlijk es Prinsjesdâg. Wat is d`r noe `nne sjoenere en sjpreekweurdelijkere dâg dân sjus dea dâg te keeze öm veur d`n iersjte kier es nuije kroenraod van De Sjraveleirs beej ein te kome. `nne dâg dea bekènt sjteit öm veuroet te loere.
M`r veur ôs begos dize dâg mèt trök kieke op wat v`r de aafgelaope jaore hadde mèt gemaak. Èderein, dus auch veer Sjraveleirs, höbbe fleenk g`t te verdure gehad. Mèt name natuurlijk de coronapandemie. In de aafgelaope jaore zien ös helaas g`t luij ontvalle, mèt es zjwartste deeptepunt veur ôs es Sjraveleirs, `t euverleije vân ôzze veurzitter Ger Stallenberg. Ôzze sjteun en touwverlaot dea altied zoeveul veur ôs gedoon heit, veur en achter de sjerme. `t is `nne meujlijke tied geweis veur ôs, en `t grauwe weer op de aafgelaope prinsjesdâg deeg auch neet veul öm ôzze sombere sjtumming te verliechte.
M`r veer waore vas besjlote öm door te goon en ôs neet te laote aafsjrikke door de oetdaginge die op ôs weegske kwaome. V`r zètte ôs sjauwers d`r onder, realisere ôs dat ôs `n belangrieke taak te wachte sjteit en geve volle gaas veuroet! `t is immers prinsjesdâg: veuroet loere en `t nuij werk jaor is begonne. Auch veur de kroenraod.
V`r besjlote mèt ôs dreije öm ens `n good gleeske beer te goon drinke, en nog eine…. En zètte ôs gedachte op `n rijjke. V`r goeide vanalles in de groep, dachte euver vân alles en nog g`t en als sjnel vloog ôs gesjprek alle kânte op en zaoge v`r de sjoen deenger in `t leeve weer. `t zönneke begos neet allein sjpreekwoordelijk te sjeine en veer bleeve m`r maojle en maojle. Zouwe v`r `t ens `nne kier gans anders doen? V`r zouwe ôs altied nog kènne versjuile achter de veur ôs zoe meujlijke jaore. Wie mie v`r dronke wie positiever v`r woorte en veurdat de zon onder waor gegânge hadde v`r, zoe doelgeriech es dat v`r zien, `n vacature klaor veur `n prinsepaar in 2023. `n vacature gebaseerd op de ervaringe vân ôs âjd Prinse en Prinsesse en zelfs ôzze Minister. `n weirek gebied in groet Hier en op oetnudiging auch daor boete, vreug op en laat naor bid, mie dân 5 weke de sjoenste kleijer die v`r m`r koste vinde in ôs Hier, `nne ooto mèt prive sjafèur en adjudantes tot eure deens. `n dreumbaan veur vuile vân ôs, mèt de bèste arbeidsveurwaarde die v`r mèr koste bedeenke, veur luij die hel wille en kènne weireke.
Aan `t eind vân d`n aovend sjtond ôs vacature al online, m`r veer besjlote neet allein te wachte op reacties heij op. Öm links en rechts g`t confetti bomme in de gemeinsjap te laote ontploffe sjtuurde v`r naor 11 ( of g`t mie of g`t minder) lui oet Hier `n oetnudiging öm ens te praote euver dize dreumbaon. De zeuktoch naor `n prinsepaar vreug öm veul fantasie en creativiteit; daoröm brachte veer vân de kroenraod veul tied mèt elkaar door en evalueerde v`r ôzze zeuktoch vân tied tot tied. V`r zörgde natuurlijk d`r veur dat v`r genog wawwelwater dronke, v`r ôs horeca zake bezeukte in Hier en gaove ôs oere en aoge fleenk de kos. Mesjien heit iemes vân uuch ôs wel gezeen. V`r höbbe `n aantal kiere , es `n soort vân geheim genootsjap ôs vergaderinge al rijend door Hier in ein vân ôs ooto`s doorgebrach. Wea woent auch alweer boe? Wea zit boe binne `n drenske te doen mèt vrun of femilie? Wea is weer aan `t weireke? Allein, of mèt `n team vân luij. Wea is auch alweer betrokke beej welke vereiniging? En zoe, sjravelendteire vulde veer ôs beukske mèt sjteeds mie nuij deenger euver de luij. Veur dat v`r `t good en wel in de gate hadde bewoge v`r ôs sjteeds sjneller riechting `t sezoen. Op de beruchte 11de vân d`n 11de hadde v`r mèt sjteeds mie luij contact gehad die ôs koste helpe mèt `t vinde vân `n nuij prinsepaar en waore ôs beukskes aardig volgesjreeve.
Toch keeke veer mèt `n sjeif aog naor ôzze jeugkemmissie. Die hadde al lang `n prinsepaarke tot hun besjikking èn ze waore aoch al 100 sjravel sjtappe weier. Wie hadde ze dat toch auch dit jaor weer zoe rap geflik??? Of laog `t toch aan ôs, de kroenraod? Waore veer toch neet vernuijend genog op zeuk gegânge of hadde v`r nog neet weier out of the box geloerd? V`r hadde al besjlote dat v`r ôs aan de traditie moste vashauwe, g`t verrassends veur de luij vân Hier , m`r auch groet Mesjtreech.
V`r hadde ôs oere good te luustere gelag en ôs aoge oetgeloerd. Mèt veul inwoeners en wijs luij `n gesjprekske gevoerd. V`r besjlote öm nog ein röndsje te rije. Al praotend en vergaderend reeje v`r vân de meule tot aan `t riek vân de Drommedarisse, en via de greun oprij laan vân Hier en de veul te sjmalle Adelbert vân scharnlaan weer trök. De luij die ôs gezeen höbbe die zalle wel gedach höbbe, wat zien dat veur `n gekke!! Veer zonge hiel hel mèt mèt de leedsjes vân ôs playlist. Vân Katja oet eige dörp tot de bekènste nummers vân Frans zoe es “veer goon nog neet naor hoes”tot aan `t nuij Karnevals leedsje vân Duo X-Elle. En zelfs `t nuij leedsje vân ôs sjraveleirkes kwaom veurbeej. V`r hadde de sfeer d`r goon inzitte en besjote öm ens oetgebreid d`r veur te goon zitte en beej trök koms `n hepke en `n drenske te doen. V`r waore vasbesjlote öm `t bèste prinsepaar te vinde dat dit jaor beej ös pas es Sjraveleirs en die dit jaor veurop kènne en maoge laope.
En nao al die meujlijke jaore kènne v`r auch dit jaor weer zigge dat v`r die verrassing mèt confetti kènne woermake. Ôs Prinsepaar zaot al dea tied veur ôs in `t ziech. V`r waore d`r al 10 kier langs gereeje en hadde ze zien weireke. `nne Prins en `n Prinses, alle 2 gebore in ôs sjoen Hier èn auch nog alle twie werkzaam in Hier. En verrassend genog alle twie onderneumer en `n locatie ter besjikking boe `t roed greun mèt trots `n gans kruuspunt kènt kleure en liet zien dat v`r auch in 2023 de Karneval in Hier doen laote leeve es noets teveure en v`r nao die meujlijke jaore noe de miest zonnige 11 jaor tegemood goon treije es vereiniging en es gemeinsjap. Mèt hiel veul trots presenteert de kroenraod aan de leef lujij vân Hier en ömsjtreke ôzze prins veur `t sezoen 2023 ……………
Prins Dave d`n 1ste en Prinses Kiki
