Vereiniging
Gesjiedenis CV de Sjraveleirs Hier 

De vastelaovendsvereineging CV. de Sjraveleirs Hier is ‘n vereineging die es doel heit, ’t organisere en begeleide vân de vastelaovend in de Hierder gemeinsjap.
Nao èllelangk beraod en euverlègk tössje de Sjokers en Sjraveliers kaome allebeij de vereineginge in 1966 mèt tössjekóms vân burgemeister Corten vân Hier, euverein dat de officieel vastelaovendsvereineging vân Hier de naam SJRAVELEIRS zouw drage.
Dizze naam is aafkomstig vân ’t Hierder dialec “Sjravele”, dit beteikent meujelek loupe. Um die reije is ’t vereinegingswape ouch ‘ne aafgetrapte sjoon, de “Sjravelsjoon”.

De vereiniging is opgeriech op 11 november 1966 (aw Sjraveleirs) en nao ’n paar jaor vân rus is door initiatiefnummer Jo Stallinga en ander Hierdeneire de vereineging nuij leve ingebloze en is de vereineging opnuij “opgereich”. Dit gebäörde in 1992 en de Sjraveleirs ginge weijer oonder de naam “CV de Sjraveleirs Hier”. De vereineging is Keuninklek erkind en is ingesjreve in ’t vereinegingsregister vân de Kamer vân Kouphandel en Fabrieke veur Zuid-Limburg, boe de statute zeen gedeponeerd.

De kleure vân de vereineging zeen ROED en GREUN. In ’t wape vân Hier kómme de kleure Keel en Sinopel veur. Ongeveer 110 jaor geleje woort door ’t besjtuur vân de gemeinte Hier, die twie kleure touwgeweze es de kleure vân ’t wape vân Hier. Dit ajd Gemeintewape weurt nog altied door de vereineging gebruuk.

De vereineging is aangesjlote beej de Samewèrrekende Mesjtreechter Vastelaovendsvereineginge (SMV). Aan dis vereineging kin per wiek vân Mesjtreech mer ein vastelaovesvereineging deilneume. Op ’t memint zeen dat ‘r èllef. 

Dis vereineginge höbbe aafsjpraok gemaak um umbeurte hunne Prins oet te rope. Weijer kin beej hun advies ingewonne weure euver allerlei zake die betrekking höbbe op de vastelaovend en oetwissele vân ervaringe mèt ’t organisere van aktiviteite. Eder vereineging heit lede aafgevaardig en die kómme regelmatig beejein in vergadering. Weijer verzörg de SMV eder jaar opnuij ’t oetrope vân ’t Mesjtreechs Vastelaovends Leedsje. 

Belangrieke eveneminte.
De heijnao umsjreve evenemente sjtoon eder jaor opnuij op ôzze calleping.

Installatie nuij Prinsepaar.
Vief weke veur de vastelaovend weurt ôs nuij Prinsepaar oetgerope. Dit gebeure vindt plaats veur ’t ajd Raodhoes op ’t Raodhoesplein in Hier. Veuraafgaond aan de installatie zal iersj aafsjeid genómme weure vân ’t Prinsepaar vân ’t jaor daoveur. In ‘ne kort cortège weurt daonao ‘t veersje Prinsepaar nao Aen de Wan gereje en dao hawwe zie dan hun Prinsereceptie. Ouch zalle dao versjèllende SMV vereineginge beej aanwezig zien.

Geboorte vân ’t nuij Sjraveleirke.
De Sjraveleirs bringe eder jaor ’n vastelaovendsgezèt oet. In dis gezèt sjtoon de gebäörtenisse vân ’t aafgeloupe jaor die in Hier gepasseerd zien.
‘t Sjraveleirke zuut op ’n ludieke meneer ’t levensleech boebeej ederein vân harte oetgenudig is. 

Prinsebal en insjete van de Vastelaovend.
Op de zaoterdag veur vastelaovend weurt ’t Prinsebal gehawwe. Iersj weurt ‘r in de vastelaovendsmès in de kèrrek vân Hier gebeijd veur de euverleje Sjraveleirs en veur ‘ne gooje aafloup vân de vastelaovend.
Op ’t Prinsebal weurt um persijs twellef oor ’s nachs de vastelaovend “ingesjote”. Dit gebäört door ’t kepot prikke vân èllef groete lochballe en door ’t ophange vân de “Sjravelsjoon”, ’t symbool vân de Hierder vastelaovend. De vastelaovend is dân officieel begónne.

Hierder Cortège.
CV de Sjraveleirs Hier organiseert eder jaor opnuij ’n groete cortège, dei op vastelaovendsmaondag door de sjtraote vân Hier trèk.

Sjleting vân de vastelaovend.
Vastelaovendsdinsdag weurt um ach oor ‘s aovends de Sjravelsjoon door ’t Prinspaar aafgelaote en weurt de Hierder vastelaovend aafgesjlote. Naodat de sjoon is aafgelaote weurt ’t Prinsepaar hun iereteikes aafgenome, die ze vânaaf ’t oetrope höbbe gedrage. Die iereteikes zeen: de scepter, de sjteek en de Prinsemedalje. 
Heijnao weure alle raod vân èllef lede in hun functie ontheve door middel vân ’t aafzètte van hunne sjteek.

Share by: